Siboru Tombaga
ᯘᯪᯅᯬᯒᯮ ᯖᯬᯔ᯲ᯅᯎ
ᯑᯪ ᯘᯑ ᯂᯮᯖ ᯉ ᯔᯒ᯲ᯎᯬᯀᯒ᯲ ᯘᯮᯎᯘᯮᯎ ᯔᯒᯪᯝᯉᯉ᯲ ᯑᯬ ᯘᯑ ᯒᯪᯇᯩ , ᯒᯪᯇᯩ ᯉ ᯔᯒ᯲ᯎᯬᯀᯒ᯲ ᯀᯬᯔ᯲ᯇᯮ ᯎᯮᯀᯘ . ᯒᯪᯘ᯲ ᯞᯬᯔ᯲ᯅᯮᯉ ᯂᯮᯂᯮᯖ᯲ ᯂᯬᯒ᯲ᯅᯬᯉ . ᯉᯔᯬᯒ ᯑᯬ ᯤᯅᯉ ᯖᯬᯒᯬᯇ᯲ ᯅᯪᯑᯰ ᯂᯀᯥᯔᯉ. ᯎᯬᯄ᯦᯲ ᯀᯩᯔᯩ ᯑᯬ ᯘᯬᯇᯬᯉ ᯀᯞ ᯉᯪ ᯤ ᯖᯒ᯲ᯎᯬᯀᯒ᯲ ᯑᯬ ᯤᯅᯉ ᯉᯔᯬᯒ .
ᯑᯪ ᯉ ᯔᯒ᯲ᯘᯒᯪᯇᯩ ᯉᯘᯪᯑ ᯖᯮᯅᯮ ᯑᯬ ᯑᯮᯀ ᯅᯬᯒᯮᯉ. ᯅᯮᯂᯅᯐᯮᯉ ᯔᯒ᯲ᯎᯬᯀᯒ᯲ ᯘᯪᯅᯬᯒᯮ ᯖᯬᯔ᯲ᯅᯎ , ᯖᯪᯉᯬᯑᯬᯂᯬᯉ᯲ᯉ ᯔᯒ᯲ᯎᯬᯀᯒ᯲ ᯘᯪᯅᯮᯉ᯲ᯖᯮᯞᯬᯉ᯲
ᯀᯞᯤ ᯑᯮᯰ ᯘᯬᯒᯰ ᯉ ᯑᯮᯀ ᯀᯬᯉ᯲ , ᯑᯪ ᯘᯑ ᯖᯪᯰᯄ᯦ᯪ ᯔᯒ᯲ᯘᯂᯪᯖ᯲ ᯔ ᯤᯉᯰᯉ ᯞᯀᯬᯘ᯲ ᯔᯖᯩ . ᯖᯪᯰᯎᯞ᯲ ᯔ ᯀᯬᯔ᯲ᯇᯮ ᯎᯮᯀᯘ ᯑᯬᯂᯬᯖ᯲ ᯅᯬᯒᯮᯉ ᯉ ᯑᯮᯀ ᯤ
ᯉᯰ ᯇᯩ ᯔᯒ᯲ᯘᯪᯖᯀᯬᯉᯬᯉ᯲ ᯀᯬᯔ᯲ᯇᯮ ᯎᯮᯀᯘ ᯑᯪᯉᯮᯉᯮᯖᯪ ᯑᯬ ᯥᯞᯀᯬᯉ᯲ᯉ .
ᯞᯩᯞᯩᯰ ᯑᯪ ᯇᯒ᯲ᯞᯩᯞᯩᯝᯉ᯲ ᯞᯀᯬᯘ᯲ ᯘᯬ ᯔᯝᯬᯞᯪ ᯑᯬ ᯀᯬᯔ᯲ᯇᯮ ᯎᯮᯀᯘ . ᯑᯪᯖᯖᯇ᯲ ᯒᯬᯂᯉ ᯥᯐᯮ ᯤ ᯀᯘ ᯐᯬᯞᯬ ᯔᯎᯬᯑᯰ ᯉᯪᯀᯉ᯲ ᯅᯬᯒᯮᯉ ᯉ ᯑᯮᯀ ᯤ , ᯤᯇᯩ ᯀᯘ ᯔᯝᯬᯞᯪ ᯤᯅᯉ .
ᯔᯬᯞᯬ ᯖᯎᯔ᯲ ᯔᯩᯖ᯲ᯔᯩᯖ᯲ ᯑᯬᯇᯩ ᯘᯬ ᯖᯮᯰ ᯑᯪᯎᯬᯖᯪᯞᯪ ᯤᯉᯰᯉ ᯇᯉᯬᯒᯬᯉᯪ ᯤ .
ᯤᯀᯰᯎᯬ ᯑᯮᯰ ᯔᯎᯬᯑᯰ ᯅᯬᯒᯮᯉ ᯤ , ᯖᯮᯰ ᯔᯘ ᯇᯩ ᯂᯐᯮᯰᯄ᯦ᯖᯬᯉ᯲ ᯉᯪ ᯤᯉᯉ ᯉᯮᯝ ᯅᯬᯤ ᯇᯞᯮᯀᯀᯬᯉ᯲ᯉ ᯑᯪᯒᯪᯉ . ᯔᯬᯞᯬ ᯞᯂᯬ ᯇᯩ ᯖᯮ ᯂᯮᯖ ᯉᯪ ᯂᯞᯄ᯦᯲ ᯉᯮᯝ ᯅᯬᯤ ᯇᯞᯮᯀᯀᯬᯉ᯲ᯉ ᯇᯝᯉᯬᯉ᯲ᯉ .
ᯀᯞ ᯘᯬᯝᯬᯉ᯲ ᯤ ᯇᯪᯰᯄ᯦ᯪᯒᯉ᯲ᯉ ᯒᯬ ᯖᯮ ᯒᯬᯂᯉ , ᯘᯂᯖ᯲ ᯔ ᯖᯮ ᯑᯎᯪᯰ ᯔᯖᯮᯀ . ᯉᯮᯝ ᯔᯎᯬᯑᯰ ᯘᯪᯅᯬᯒᯮ , ᯐᯞ ᯉᯮᯝ ᯖᯰ ᯇᯔᯖᯰᯉ . ᯉᯮᯝ ᯎᯬᯑᯰ ᯑᯪᯤᯑ ᯐᯞ ᯅᯎᯘ᯲ ᯑᯪᯂᯪᯞᯞ .
ᯑᯪᯅᯩᯒᯩᯰ ᯖᯬᯒᯬᯇ᯲ ᯂᯞᯄ᯦᯲ ᯀᯰᯄ᯦ ᯉ ᯔᯥᯞᯪ ᯅᯮᯞᯮᯰ ᯔᯩᯰᯄ᯦ᯩᯞ᯲ ᯔᯒ᯲ᯞᯘ᯲ ᯉᯪ ᯒᯬᯂ ᯂᯮᯂᯮᯖ᯲ ᯔᯒᯬᯞᯬᯇᯬᯞᯬᯇ᯲ . ᯖᯒ᯲ᯞᯬᯅᯪ ᯔ ᯤ ᯑᯪ ᯇᯩᯘ᯲ᯖ ᯇᯒᯮᯉ᯲ᯐᯮᯂᯬᯉ᯲ ᯉᯪ ᯀᯉᯄ᯦᯲ ᯑᯬᯂᯬᯖ᯲ ᯅᯬᯒᯮ.
ᯀᯤ ᯑᯪ ᯉ ᯔᯒᯮᯉ᯲ᯐᯮᯄ᯦᯲ ᯅᯬᯞᯬᯉ᯲ ᯀᯉᯄ᯦᯲ ᯤ ᯘᯤ ᯇᯪᯉ᯲ᯖᯬᯒ᯲ ᯤᯅᯬᯖᯬᯉ ᯑᯬ ᯔᯰᯂᯮᯉ᯲ᯖᯪ ᯀᯔ᯲ᯇᯰ. ᯀᯂ᯲ ᯖᯮᯀ ᯉᯪ ᯂᯞᯄ᯦᯲ ᯉ ᯔᯒᯪᯅᯬᯖᯬ ᯤ. ᯐᯞ ᯔᯬᯞᯬ ᯘᯬ ᯀᯑᯬᯰ ᯤᯅᯬᯖᯬᯰᯂᯮ ᯘᯪᯖᯩᯀᯉᯬᯉ᯲ ᯉᯔ ᯂᯔᯪ .
ᯀᯑᯬᯰ ᯑᯬ ᯉᯪᯀᯉ᯲ ᯀᯔᯝᯮᯑ , ᯀᯞᯤ ᯀᯪᯉ᯲ᯑᯑ ᯂᯩᯀ ᯂᯔᯪ ᯇᯞᯪᯞᯮᯰᯂᯬᯉ᯲ , ᯂᯮᯒᯬᯂ ᯀᯞ ᯘᯬ ᯑᯪᯞᯬᯀᯘ᯲ ᯑᯔᯰ ᯇᯒ᯲ᯘᯪᯉᯮᯀᯉ᯲ ᯤ , ᯂᯀᯑᯬᯝᯬᯉ᯲ᯉ ᯤ ᯑᯪᯇᯒ᯲ᯞᯬᯔᯬᯞᯬᯔᯬᯂᯬᯉ᯲ .
ᯀᯞ ᯉᯪ ᯤ ᯀᯬ ᯖᯂᯩ ᯀᯮᯔ᯲ᯅᯂᯩᯉ᯲ ᯑᯪᯑᯬᯄ᯦᯲ : ᯘᯪᯖᯪᯉ᯲ᯐᯄ᯦᯲ ᯅᯮᯞᯮ , ᯂᯥ ᯔᯒ᯲ᯂᯖᯪᯂᯬᯒᯉ᯲ . ᯎᯪᯀᯬᯖᯉ᯲ ᯑᯬ ᯤᯅᯉ ᯇᯮᯉᯮ , ᯎᯩᯀᯂᯉ᯲ ᯔᯒ᯲ᯑᯬᯝᯉ᯲ .
ᯑᯪ ᯉ ᯂᯮᯉ᯲ᯑᯮᯞ᯲ ᯝᯬᯝᯬᯰ ᯂᯮᯂᯮᯖ᯲ ᯔᯒ᯲ᯉᯪᯝᯬᯖ᯲ ᯅᯎᯪᯀᯉ᯲ᯉ ᯤ ᯘᯪᯅᯬᯒᯮ ᯖᯬᯔ᯲ᯅᯎ , ᯒᯬ ᯔ ᯘᯬᯀᯒ ᯔᯞ᯲ᯞᯪᯝᯪᯰ ᯖᯮ ᯘᯪᯇᯒᯩᯀᯬᯉ᯲ᯉ : ᯇᯝᯩᯀᯬᯞ᯲ᯔᯪ ᯀᯞᯩ ᯘᯬᯞᯮ ᯑᯪ ᯖᯀᯬ , ᯔᯬᯞᯬ ᯔᯇᯬᯰᯎᯬᯞ᯲ ᯂᯬᯞᯩᯔᯪ , ᯔᯀᯮᯇ᯲ ᯔ ᯂᯬ ᯘᯬ ᯖᯒ᯲ᯅᯬᯖᯬ . ᯇᯝᯩᯀᯬᯞ᯲ᯔᯪ ᯅᯬᯒᯮ , ᯅᯬᯒᯮ ᯉ ᯘᯬ ᯔᯒᯪᯅᯬᯖᯬ , ᯔᯬᯞᯬ ᯔᯖᯩ ᯀᯔᯰᯔᯪ , ᯘᯪᯖᯩᯀᯉᯬᯉ᯲ ᯉᯔ ᯂᯬ .
ᯑᯪ ᯉ ᯘᯂᯞᯪ ᯑᯪᯐᯬᯥ ᯘᯪᯅᯬᯒᯮ ᯖᯬᯔ᯲ᯅᯎ ᯔ ᯀᯰᯎᯪᯉ ᯘᯪᯅᯮᯉ᯲ᯖᯮᯞᯬᯉ᯲ ᯑᯪᯑᯬᯄ᯦᯲ ᯔ : ᯀᯰᯎᯪ ᯀᯀᯮᯖ᯲ ᯀᯑᯬᯰ ᯉᯪᯀᯉ᯲ ᯇᯪᯉᯒᯪᯅᯬᯖᯬᯉ᯲ᯖ , ᯀᯪᯉ᯲ᯑ ᯖᯮᯰ ᯘᯤ ᯔᯝᯇᯪᯀᯉᯪ ᯅᯩ ᯂᯪᯖ ᯖᯮ ᯀᯰᯄ᯦ ᯉ ᯔᯥᯞᯪ ᯅᯮᯞᯮᯰ ᯉ ᯔᯒ᯲ᯇᯪᯉᯒᯪᯅᯬᯖ᯲ ᯤ . ᯀᯪᯉ᯲ᯑ ᯇᯬᯞ ᯂᯪᯖ ᯉᯪᯀᯉ᯲ ᯂᯬᯞ᯲ᯘᯬᯀᯉ᯲ ᯘᯬᯝᯬᯉ᯲ ᯖᯬᯒᯬᯇ᯲ ᯂᯞᯄ᯦᯲ ᯉ ᯇᯬᯞ ᯔᯒ᯲ᯂᯬᯤᯂᯬᯤ ᯔᯝᯞᯮᯞᯮᯤ ᯘᯪᯥᯖᯝᯬᯉ᯲ ᯔᯰᯎᯬᯂᯪ ᯀᯮᯉ᯲ᯐᯮᯄ᯦᯲ ᯉᯪ ᯀᯉᯄ᯦᯲ᯉ . ᯀᯞᯤ ᯀᯪᯉ᯲ᯑᯑ ᯂᯂᯮᯀᯀᯬᯉ᯲ ᯤ ᯀᯰᯎᯪᯀ , ᯀᯤ ᯑᯪᯑᯬᯄ᯦᯲ ᯉᯖᯮᯀᯖᯮᯀ ᯑᯬ : ᯔᯬᯞᯬ ᯇᯬᯉ᯲ᯐᯬᯖ᯲ ᯐᯅᯮ ᯞᯮᯔ᯲ᯅᯰ ᯔ ᯅᯒ .
ᯀᯀᯮᯖ᯲ ᯀᯑᯬᯰ ᯔ ᯉᯪᯀᯉ᯲ ᯤᯅᯬᯖᯬᯉ᯲ᯖ ᯀᯖᯩᯂᯩ ᯀᯰᯎᯪᯀ
ᯀᯬ ᯅᯮᯞᯮᯰ ᯎᯀᯬᯞ᯲ .
ᯒᯉ᯲ᯖᯪᯰ ᯉᯪ ᯂᯥ ᯘᯪᯖᯒᯄ᯦᯲
ᯀᯬ ᯅᯎᯪᯀᯉ᯲ ᯉ ᯑᯝᯬᯞ᯲
ᯂᯉ᯲ᯘᯪᯖ᯲ ᯉᯪ ᯉ ᯘᯬ ᯔᯒ᯲ᯑᯬᯝᯉ᯲ ᯀᯉᯄ᯦᯲
ᯂᯬᯒ᯲ᯅᯬ ᯞᯬᯔ᯲ᯅᯮ ᯂᯬᯑ ᯑᯪ ᯀᯑᯒᯉ᯲ , ᯂᯬᯞᯉ᯲ ᯂᯔᯪ ᯑᯮᯀ ᯅᯬᯒᯮ ᯑᯬ ᯒᯪᯉ᯲ᯑᯰᯉ . ᯑᯮᯀ ᯑᯬ ᯂᯪᯖ ᯅᯬᯒᯮ ᯘᯬ ᯀᯑᯬᯰ ᯔᯒ᯲ᯑᯬᯝᯉ᯲ ᯀᯉᯄ᯦᯲ . ᯀᯀᯮᯖ᯲ ᯀᯑᯬᯰ ᯇᯪᯉᯒᯪᯅᯬᯖ᯲ᯖ , ᯘᯝᯇ᯲ ᯑᯬ ᯂᯪᯖ ᯑᯪᯤᯑ ᯂᯞᯄ᯦᯲ .
ᯅᯮᯞᯮᯰ ᯉᯪ ᯘᯪ ᯔᯒ᯲ᯂᯞᯬᯘᯪ ᯔᯖᯩ ᯑᯪᯑᯩᯎᯩ ᯂᯬᯒ᯲ᯅᯬ, ᯇᯮᯉ᯲ᯐᯮᯰ ᯑᯪᯐᯞᯬ ᯖᯬᯉ᯲ᯑᯪ , ᯘᯪᯖᯩᯀᯉᯬᯉ᯲ ᯉᯪ ᯉ ᯘᯬ ᯔᯒᯪᯅᯬᯖᯬ .
ᯀᯰᯎᯪᯀ ᯅᯮᯉ᯲ᯖᯮᯞᯬᯉ᯲ , ᯑᯪᯇᯝᯪᯑᯬ ᯒᯬᯂᯰᯂᯮ ᯑᯪᯬᯘ᯲ ᯔ ᯘᯰᯄ᯦ᯇ᯲ᯖ ᯀᯘ ᯖᯘᯬᯘᯬᯤ ᯀᯔᯉ᯲ᯖ ᯔᯝᯬᯞᯬᯤ , ᯀᯰᯎᯪᯀᯖ᯲ ᯖᯮᯰ ᯀᯑᯬᯰ ᯇᯪᯉᯒᯪᯅᯬᯖ᯲ᯖ , ᯤᯂᯬᯖᯪᯂᯬᯖ᯲ ᯉᯪ ᯖᯬᯉ᯲ᯑᯪᯉ᯲ᯖ .
ᯑᯎᯪᯰᯖ ᯉᯮᯝ ᯞᯔ᯲ ᯖᯮ ᯖᯬᯒᯘ᯲ᯉ . ᯔᯬᯞᯬ ᯖᯮᯰ ᯀᯑᯬᯰ ᯀᯉᯄ᯦᯲ ᯉᯪ ᯂᯞᯄ᯦᯲ ᯉ ᯔᯝᯮᯰᯄ᯦ᯇ᯲ ᯖᯒᯮᯇ᯲ ᯔᯔᯩᯞᯩ ᯖᯮᯞᯰᯉ . ᯑᯩᯰᯎᯉ᯲ ᯔ ᯤ ᯀᯞᯩ ᯉ ᯅᯘ ᯑᯬᯘ᯲ ᯔ ᯒᯬᯂᯉ᯲ᯖ .
ᯞᯂᯬ ᯔ ᯉᯘᯪᯑ ᯔᯉ᯲ᯑᯇᯬᯖ᯲ᯂᯬᯉ᯲ ᯀᯔᯉ , ᯐᯞ ᯑᯪᯑᯬᯄ᯦᯲ ᯔ : ᯀᯔᯰ ᯇᯒ᯲ᯘᯪᯉᯮᯀᯉ᯲ , ᯑᯪᯇᯝᯪᯑᯬ ᯒᯬᯂᯉᯔᯪ ᯀᯔᯰ , ᯉᯀᯪᯰ ᯅᯬᯒ᯲ᯂᯖ᯲ ᯔᯝᯒᯪᯒᯪᯖ᯲ ᯀᯰᯎᯪᯀᯖ᯲ ᯀᯑᯬᯰ ᯇᯪᯉᯒᯪᯅᯬᯖ᯲ᯉᯔᯪ. ᯤᯀᯰᯎᯬ ᯀᯞ ᯉᯪ ᯘᯪᯉᯔᯬᯖ᯲ ᯂᯬᯒ᯲ᯅᯬ , ᯞᯬᯔ᯲ᯅᯮ , ᯂᯬᯑ , ᯘᯬᯝᯬᯉ᯲ ᯤ ᯉᯰ ᯒᯪᯰᯎᯪᯖ᯲ , ᯔᯘ᯲ ᯅᯬᯤ ᯑᯬ ᯇᯖᯮᯇᯀᯬᯉ᯲ᯖ . ᯎᯬᯑᯰ ᯑᯬ ᯀᯔᯰ ᯇᯪᯉᯰᯄ᯦ᯔ᯲ . ᯔᯬᯞᯬ ᯑᯪᯇᯝᯪᯑᯬ ᯇᯒ᯲ᯐᯮᯂᯮᯖ᯲ ᯘᯪᯀᯉ᯲ᯇᯪᯉᯂᯉ᯲ ᯘᯪᯎᯎᯖ᯲ ᯑᯮᯂᯮᯖ᯲ ᯘᯬ ᯇᯬᯞ ᯂᯪᯖ ᯂᯬᯞ᯲ᯘᯬᯀᯉ᯲ , ᯀᯤ ᯒᯑᯩ ᯑᯬ ᯤ ᯘᯮᯑᯩ , ᯘᯬᯝᯬᯉ᯲ ᯤ ᯑᯬ ᯉᯰ ᯘᯪᯉᯔᯬᯖ᯲ .
ᯐᯑᯪ ᯑᯪᯑᯬᯄ᯦᯲ ᯀᯬᯔ᯲ᯇᯮ ᯎᯮᯀᯘ ᯔ ᯖᯮ ᯅᯬᯒᯮᯉ ᯤ . ᯤᯖᯬ ᯅᯬᯒᯮ ᯂᯘᯪᯀᯉ᯲ . ᯎᯉ᯲ᯐᯰᯉ ᯤ ᯇᯪᯰᯄ᯦ᯪᯒᯉ᯲ᯔᯪ , ᯉ ᯑᯩᯰᯎᯉ᯲ ᯘᯪᯖᯮᯖᯮ ᯑᯬ ᯀᯇᯬᯀᯇᯬᯔᯪ , ᯀᯞᯤ ᯂᯮᯘᯮᯂᯖ᯲ ᯔ ᯎᯉ᯲ᯐᯰᯂᯮ , ᯐᯞ ᯂᯮᯞᯪᯞᯪᯖ᯲ ᯔ ᯅᯬᯞᯬᯉ᯲ᯂᯮ , ᯅᯩᯂ ᯔ ᯅᯂᯩᯉᯬᯉ᯲ᯂᯮ ᯤᯖᯬ .
ᯞᯰᯞᯰ ᯖᯮᯒᯄ᯦᯲ ᯅᯪᯉᯂᯩᯉ᯲ ᯉᯪ ᯖᯎᯉ᯲ ᯂᯇᯬᯘᯬᯀᯬᯉ᯲ ᯤ ᯘᯬ ᯅᯬᯤ ᯅᯩ ᯔᯮᯞᯄ᯦᯲ , ᯉᯮᯝ ᯐᯬᯉᯬᯄ᯦᯲ ᯇᯮᯉ᯲ᯘᯮ ᯉᯪ ᯑᯞᯉ᯲ , ᯖᯮᯰ ᯤᯘᯩ ᯅᯩ ᯉ ᯀᯬᯞᯬ ᯖᯮ ᯉᯮᯝ ᯖᯮᯰᯄ᯦ᯬᯖ᯲ ᯑᯪ ᯖᯝᯉ᯲ , ᯥᯅᯉ᯲ ᯑᯪ ᯘᯪᯔᯉ᯲ᯐᯮᯐᯮᯰ . ᯂᯮᯒᯰ ᯎᯬᯎᯬ ᯔᯒ᯲ᯑᯞᯉ᯲ , ᯉᯮᯝ ᯎᯮᯒ᯲ᯑᯮᯰ ᯖᯰᯎᯮᯒᯮᯰ
ᯐᯑᯪ ᯑᯪᯑᯬᯄ᯦᯲ ᯘᯪ ᯅᯬᯒᯮ ᯖᯬᯔ᯲ᯅᯎ ᯔ ᯔᯝᯞᯮᯘᯪ ᯂᯖ ᯉᯪ ᯀᯔᯉ ᯤ . ᯘᯬᯝᯬᯉ᯲ ᯤ ᯇᯩ ᯑᯪᯑᯬᯄ᯦᯲ ᯂᯬ ᯀᯔᯰ ᯘᯤ ᯀᯬᯞᯬᯀᯉ᯲ᯔᯮ ᯑᯬ ᯇᯝᯪᯑᯬᯀᯉ᯲ᯉᯔᯪ . ᯉᯪᯞᯮᯞᯮᯀᯉ᯲ ᯔ ᯐᯬᯞᯬ ᯑᯖᯮ ᯇᯒ᯲ᯔᯉᯮᯄ᯦᯲ , ᯀᯘ ᯐᯬᯞᯬ ᯑᯪᯖᯪᯞᯪᯄ᯦᯲ ᯑᯩᯅᯖ ᯉᯪ ᯇᯒ᯲ᯔᯉᯮᯂᯬᯉ᯲ . ᯀᯘ ᯅᯪᯉᯬᯖᯬ ᯔᯬᯞᯬ ᯉ ᯀᯑᯬᯰ ᯑᯬ ᯉ ᯀᯬᯞᯬ ᯔᯝᯬᯞᯬᯤ ᯑᯔᯰ , ᯀᯘ ᯇᯪᯉ᯲ᯖᯬᯒ᯲ ᯀᯑᯬᯰ ᯇᯬᯘ᯲ ᯉᯪ ᯒᯬᯂ .
ᯑᯪᯘᯮᯰᯄ᯦ᯮᯉ᯲ ᯀᯬᯔ᯲ᯇᯮ ᯎᯮᯀᯘ , ᯀᯑᯬᯰ ᯂᯮᯒᯬᯂ ᯑᯪᯅᯬᯖᯬ ᯂᯬ ᯤᯖᯬ ?
ᯀᯑᯬᯰ ᯑᯬ ᯀᯔᯰ ᯂᯮᯅᯩᯎᯩ ᯅᯒᯪᯖ ᯂᯮᯖᯝᯪ ᯀᯞᯮᯀᯞᯮ ᯔᯬᯞᯬ ᯑᯪᯖᯪᯞᯪᯄ᯦᯲ ᯑᯪᯖᯂᯖᯂ ᯉᯪ ᯔᯉᯮᯄ᯦᯲ ᯅᯬᯤ ᯑᯬ ᯅᯬᯖᯬᯀᯬᯉ᯲ᯉ ᯔᯒ᯲ᯂᯪᯖᯩ ᯀᯪᯉ᯲ᯖᯩᯀᯉ᯲ .
ᯑᯪ ᯑᯪᯀ ᯂᯮᯒᯬᯂ ᯑᯖᯮ ᯉ ᯔᯞᯬ ᯤ ? ᯑᯀᯬ ᯔ ᯤ
ᯑᯀᯬ ᯇᯩ ᯀᯔᯰ , ᯞᯮᯞᯮᯀᯉ᯲ ᯑᯬ ᯂᯮᯒᯬᯂ ᯎᯬᯀᯒ᯲ᯉ ?
ᯅᯂ᯲ ᯎᯮᯒᯮ ᯔᯒ᯲ᯖᯮᯰᯄ᯦ᯬᯖ᯲ ᯅᯬᯘᯪ ᯑᯬ ᯀᯔᯰ .
ᯑᯀᯬ ᯔ ᯤ ᯖᯮᯖᯮ ᯤᯖᯬ ᯤᯝᯉᯉ᯲ᯉ ᯤ, ᯀᯪᯰᯄ᯦ᯬᯉ᯲ ᯔᯒ᯲ᯑᯞᯉ᯲ ᯑᯮᯀ ᯀᯒᯪ ᯑᯮᯀ ᯅᯬᯒ᯲ᯝᯪᯉ᯲ ᯀᯘ ᯘᯂᯖ᯲ ᯖᯮ ᯘᯪ .
ᯖᯒᯪᯝᯬᯖ᯲ ᯉᯪ ᯤ ᯀᯔᯰ , ᯀᯂᯮ ᯔᯒ᯲ᯒᯬᯂᯂᯬᯉ᯲ ᯤᯉᯬᯉ᯲ , ᯀᯘ ᯥᯉᯰ ᯑᯇᯬᯖ᯲ ᯔᯒ ᯀᯂᯮ ᯑᯪ ᯑᯞᯉ᯲ .
ᯔᯒ᯲ᯇᯪᯰᯄ᯦ᯪᯒ᯲ ᯘᯪᯅᯬᯒᯮ ᯖᯬᯔ᯲ᯅᯎ. ᯔᯒ᯲ᯘᯞᯪᯉ᯲ ᯔᯒ᯲ᯇᯂᯩᯀᯉ᯲ ᯀᯉᯄ᯦᯲ ᯞᯂᯪ ᯔ ᯤᯅᯉ . ᯑᯪᯅᯮᯀᯖ᯲ ᯔ ᯖᯞᯪᯖᯞᯪ ᯉ ᯇᯪᯉᯮᯖᯒ᯲ ᯑᯪᯅᯂᯩᯉ᯲ ᯔ ᯀᯅᯪᯖ᯲ᯉ ᯑᯬᯂᯬᯖ᯲ ᯘᯔ᯲ᯇᯩᯘᯔ᯲ᯇᯩᯉ , ᯂᯮᯂᯮᯖ᯲ ᯔᯰᯂᯑᯰ ᯂᯐᯮᯖ᯲ . ᯑᯪᯉᯰᯄ᯦ᯬᯂᯪ ᯑᯬᯞᯬᯄ᯦᯲ , ᯑᯪᯖᯮᯀᯖᯪ ᯒᯮᯒ , ᯂᯮᯂᯮᯖ᯲ ᯔᯔᯬᯞᯮᯘ᯲ ᯑᯞᯉ᯲ ᯞᯰᯞᯰ . ᯑᯪ ᯞᯬᯝᯬ ᯉᯪ ᯞᯰᯞᯰ ᯤ , ᯖᯒ᯲ᯘᯮᯰᯎᯮᯞ᯲ ᯔ ᯒᯬᯂᯉ , ᯂᯉ᯲ᯘᯪᯖ᯲ ᯝᯬᯖ᯲ᯝᯬᯖ᯲ . ᯇᯒ᯲ᯑᯞᯉ᯲ ᯉ ᯇᯪᯉᯄ᯦᯲ᯘ ᯉᯪ ᯅᯎᯪᯀᯉ᯲ , ᯀᯞ ᯉᯪ ᯤ ᯑᯪᯑᯬᯄ᯦᯲ ᯔ : ᯀᯬᯔ᯲ᯇᯮᯰ ᯔᯮᯞᯐᯑᯪ ᯉ ᯅᯬᯞᯬᯉ᯲ ᯖᯖᯇ᯲ ᯔ ᯅᯬᯒᯮ ᯀᯑᯪ ᯉ ᯂᯩᯀ ᯂᯮᯂᯪᯞᯞ. ᯉᯮᯝ ᯂᯮᯅᯬᯞᯮᯘ᯲ ᯉ ᯘᯬ ᯂᯩᯀ ᯂᯮᯤᯑ , ᯉᯮᯝ ᯂᯮᯖᯀᯬᯉ᯲ ᯉ ᯘᯬ ᯂᯩᯀ ᯂᯮᯂᯪᯞᯞ . ᯀᯪᯰᯄ᯦ᯬᯉ᯲ ᯇᯘᯪᯰᯄ᯦ᯪᯘᯪᯰᯄ᯦ᯪ ᯒᯮᯇ ᯀᯂᯮ, ᯇᯥᯅᯥᯅ ᯅᯬᯂᯪ , ᯖᯀᯬᯉᯬᯉ᯲ ᯔ ᯉ ᯞᯬᯐ ᯀᯬᯉ᯲ , ᯔᯬᯞᯬ ᯑᯮᯰ ᯑᯪᯐᯞᯬ ᯖᯬᯉ᯲ᯑᯪ .
ᯔᯉ᯲ᯑᯇᯬᯖ᯲ᯂᯬᯉ᯲ ᯂᯮᯖ ᯤ ᯑᯪᯤᯑ ᯔ ᯀᯑᯬᯰ ᯘᯑ ᯉᯖᯮᯀᯖᯮᯀ , ᯂᯮᯉ᯲ᯑᯮᯞ᯲ᯂᯮᯉ᯲ᯑᯮᯞ᯲ ᯑᯪ ᯂᯒ᯲ᯅᯝᯉ᯲ ᯉᯪ ᯂᯮᯖ ᯤ ᯂᯮᯂᯮᯖ᯲ ᯔᯉ᯲ᯐᯂᯐᯂ ᯅᯮᯞᯮ ᯉ ᯔᯒ᯲ᯘᯮᯒᯖ᯲ . ᯐᯑᯪ ᯑᯪᯘᯪᯘᯩ ᯤᯅᯉ ᯔ ᯉᯖᯮᯀᯖᯮᯀ ᯤ ᯉᯪᯉ᯲ᯉ ᯔ : ᯂᯬᯒᯘ᯲ ᯔ ᯀᯔᯰ . ᯎᯅᯩ ᯑᯪᯀᯞᯮᯘᯪ ᯤᯅᯉ ᯔ ᯂᯬᯒᯘ᯲ .
ᯔᯉᯮᯰᯄ᯦ᯮᯉ᯲ ᯀᯂᯮ ᯐᯬᯞᯬ ᯀᯔᯰ ᯒᯐᯉᯔᯪ , ᯉᯪᯉ᯲ᯉ ᯘᯪᯅᯬᯒᯮ ᯖᯬᯔ᯲ᯅᯎ . ᯅᯂ᯲ ᯑᯩᯰᯎᯉ᯲ ᯞᯀᯩ , ᯉᯪᯉ᯲ᯉ ᯉᯖᯮᯀᯖᯮᯀ ᯤ . ᯖᯞᯪᯖᯞᯪ ᯀᯔ᯲ᯅᯞᯰ , ᯤᯂᯮᯒ᯲ᯉ ᯇᯪᯉ᯲ᯖᯮ ᯂᯬᯒᯪ , ᯖᯒ᯲ᯅᯒᯪᯖ ᯑᯬ ᯖᯮ ᯘᯪ ᯘᯮᯎᯘᯮᯎ ᯂᯮᯖ ᯉᯪ ᯑᯔᯰ , ᯎᯮᯒᯮ ᯐᯞ ᯑᯖᯮ ᯔᯒ᯲ᯖᯮᯰᯄ᯦ᯬᯖ᯲ ᯅᯬᯘᯪ . ᯑᯪ ᯑᯪᯀ ᯑᯬ ᯒᯐᯉᯔᯪ ᯑᯪᯅᯬᯖᯬ ᯂᯔᯮᯉ ᯤᯝᯉᯉ᯲ᯉ ?
ᯀᯂ ᯂᯮᯒᯬᯂ ᯉ ᯇᯬᯒ᯲ᯞᯮ ᯑᯪ ᯉᯘᯪᯑ , ᯉᯪᯉ᯲ᯉ ᯉᯖᯮᯀᯖᯮᯀ ᯤ.
ᯇᯬᯒ᯲ᯞᯮ ᯘᯪᯖᯮᯖᯮ ᯑᯬ ᯒᯐᯉᯔᯪ ᯉ ᯉᯀᯩᯰ ᯔᯝᯞᯇᯪ ᯉᯘᯪᯑ ᯑᯬ ᯀᯂᯮ ᯇᯪᯉᯖᯮᯑᯮ ᯖᯮ ᯂᯮᯖᯉᯔᯪ ᯉᯪᯉ᯲ᯉ .
ᯀᯂᯮ ᯑᯬ ᯉᯪᯞᯮᯞᯮᯀᯉ᯲ᯔᯪ . ᯀᯂ ᯔ ᯂᯮᯒᯬᯂ ᯉ ᯇᯪᯉᯝᯪᯑᯬ ᯉᯪ ᯒᯬᯂᯔ᯲ ᯉ ᯉᯀᯩᯰ ᯘᯪᯇᯖᯮᯇᯀᯬᯉ᯲ᯖ ᯀᯘ ᯂᯮᯅᯬᯖᯬ ᯔᯔ᯲ᯅᯬᯀᯉ᯲ ᯥᯞᯥᯞ ᯉ ᯂᯬᯔ᯲ᯅᯒ᯲ ᯖᯮ ᯘᯪᯥᯞᯀᯬᯉ᯲ ᯤ .
ᯐᯑᯪ ᯑᯪᯑᯬᯄ᯦᯲ ᯘᯪᯅᯬᯒᯮ ᯖᯬᯔ᯲ᯅᯎ ᯤ ᯔ : ᯉ ᯉᯀᯩᯰ ᯔᯉᯪᯰᯄ᯦ᯪᯒ᯲ ᯑᯩᯅᯖ ᯉᯪ ᯇᯒ᯲ᯔᯉᯮᯂᯬᯉ᯲ ᯑᯬ ᯑᯖᯮᯉᯔᯪ.
ᯀᯉ᯲ᯖᯬᯰ ᯑᯩᯰᯎᯉ᯲ , ᯀᯞᯤ ᯂᯮᯂᯮᯖ᯲ᯉ ᯖᯮ ᯂᯮᯖ ᯑᯪᯀ ᯔ ᯂᯪᯖ ᯅᯬᯒ᯲ᯂᯖ᯲ ?
ᯖᯮ ᯂᯮᯖ ᯘᯪᯘᯮᯎᯘᯮᯎ ᯒᯐᯉᯔᯪ ᯉᯪᯉ᯲ᯉ ᯘᯪᯅᯬᯒᯮ ᯖᯬᯔ᯲ᯅᯎ
ᯖᯮ ᯐᯅᯮ ᯉᯪ ᯤᯘᯩ ᯔ ᯂᯪᯖ ?
ᯀᯬᯂ᯲ ᯖᯮ ᯐᯅᯮ ᯑᯬ ᯒᯐ ᯤ, ᯀᯤ ᯉᯔᯬᯒ ᯑᯬ ᯉᯘᯪᯑ ᯉᯪᯉ᯲ᯉ ᯑᯖᯮ ᯤ .
ᯅᯬᯒ᯲ᯂᯖ᯲ ᯔ ᯉᯘᯪᯑ ᯐᯞ ᯑᯪᯇᯇᯮᯝᯮ ᯖᯮ ᯂᯐᯮᯖ᯲ ᯀᯰᯄ᯦ ᯎᯮᯒᯪᯎᯮᯒᯪ , ᯅᯮᯞᯩᯅᯮᯞᯩ ᯉᯮᯝ ᯘᯪᯰᯄ᯦ᯬᯇ᯲ ᯑᯬᯂᯬᯖ᯲ ᯖᯀᯬᯀᯒ᯲ , ᯀᯪᯉ᯲ᯑᯰ ᯀᯑᯬᯰ ᯅᯩ ᯉ ᯞᯪᯇᯩ .
ᯑᯪ ᯉ ᯔᯒ᯲ᯑᯞᯉ᯲ ᯤ ᯉᯘᯪᯑ ᯒᯇ᯲ ᯑᯬᯂᯬᯖ᯲ ᯑᯖᯮ ᯤ , ᯖᯮᯰ ᯘᯬ ᯑᯪᯅᯬᯖᯬ ᯑᯖᯮ ᯔᯒ᯲ᯖᯮᯰᯄ᯦ᯬᯖ᯲ ᯅᯬᯘᯪ , ᯉ ᯇᯥᯅᯥᯅ ᯒᯮᯇ ᯑᯬ ᯘᯪᯅᯬᯒᯮ ᯖᯬᯔ᯲ᯅᯎ .
ᯞᯘ᯲ ᯔ ᯒᯬᯂ ᯉᯪ ᯘᯪᯅᯬᯒᯮ ᯖᯬᯔ᯲ᯅᯎ ᯀᯞ ᯐᯮᯔ᯲ᯇᯰ ᯉ ᯉᯪᯞᯮᯞᯮᯀᯉ᯲ , ᯖᯒᯪᯑ ᯉ ᯐᯪᯉᯞᯂᯉ᯲ . ᯀᯘᯪ ᯔ ᯒᯬᯂ ᯉᯪ ᯔᯮᯞᯐᯑᯪ ᯉ ᯅᯬᯞᯬᯉ᯲ , ᯘᯤ ᯀᯑᯬᯰ ᯔ ᯇᯪᯉᯒᯪᯅᯬᯖ᯲ , ᯘᯬᯝᯬᯉ᯲ ᯉ ᯇᯪᯉᯝᯪᯑᯬ ᯉᯪ ᯒᯬᯂ ᯑᯪ ᯅᯎᯘᯉ᯲ .
ᯘᯂᯖ᯲ ᯔ ᯉᯘᯪᯑ ᯖᯮ ᯂᯮᯖ ᯉᯪ ᯀᯬᯔ᯲ᯇᯮ ᯎᯮᯀᯘ . ᯑᯪ ᯉ ᯘᯂᯖ᯲ ᯖᯮ ᯂᯒ᯲ᯅᯝᯉ᯲ ᯑᯪᯇᯂᯖᯬᯇ᯲ ᯔ ᯞᯰᯄ᯦ᯉ ᯖᯮ ᯖᯬᯝᯖᯬᯝ ᯉᯪ ᯀᯞᯔᯉ᯲ ᯤ , ᯇᯪᯉ᯲ᯖᯬᯒ᯲ ᯐᯬᯥᯐᯬᯥ ᯔ ᯑᯖᯮ ᯔᯒ᯲ᯖᯮᯰᯄ᯦ᯬᯖ᯲ ᯅᯬᯘᯪ , ᯑᯪ ᯐᯅᯮ ᯑᯬ ᯂᯬ ᯒᯐᯉᯔᯪ ᯀᯬᯔ᯲ᯇᯮ ᯎᯮᯀᯘ ? ᯇᯪᯉ᯲ᯖᯬᯒ᯲ ᯑᯪᯖᯉ᯲ᯑ ᯑᯬ ᯘᯬᯀᯒ ᯤ ᯘᯪᯀᯉ᯲ ᯐᯅᯮ , ᯎᯅᯩ ᯇᯪᯉ᯲ᯖᯬᯒ᯲ ᯑᯪᯀᯞᯮᯘᯪ ᯔ , ᯀᯤ ᯂᯬ ᯑᯬ ᯤ ᯔᯒ᯲ᯖᯮᯰᯄ᯦ᯬᯖ᯲ ᯅᯬᯘᯪ ? ᯤ ᯑᯬ ᯒᯐᯉᯔᯪ ᯉᯪᯉ᯲ᯉ
ᯅᯂ᯲ ᯉᯰᯄ᯦ᯬᯄ᯦᯲ ᯔ ᯂᯬ ᯖᯮ ᯐᯅᯮ , ᯉᯪᯉ᯲ᯉ ᯀᯬᯔ᯲ᯇᯮ ᯎᯮᯀᯘ .
ᯞᯘ᯲ ᯔ ᯒᯬᯂ ᯉᯪ ᯉᯘᯪᯑ ᯉ ᯑᯮᯀ , ᯀᯤ ᯉᯮᯝ ᯞᯩᯞᯩᯰ ᯀᯪᯉ᯲ᯑᯰ ᯔᯘᯪᯇᯤᯑᯀᯉ᯲ . ᯀᯞᯤ ᯑᯪᯘᯮᯰᯄ᯦ᯮᯉ᯲ ᯔ , ᯑᯪ ᯑᯪᯀ ᯤᯔ ᯉ ᯔᯝᯞᯇᯪ ᯀᯂᯮ ? ᯉᯪᯉ᯲ᯉ .
ᯂᯮᯐᯬᯥ ᯇᯩ ᯑᯖᯮᯉᯔᯪ . ᯅᯬᯒᯮ ᯖᯬᯔ᯲ᯅᯎ ! ᯑᯪᯘᯬᯉ᯲ ᯑᯬ ᯀᯂᯮ ᯀᯔᯰ , ᯉᯪᯉ᯲ᯉ . ᯐᯑᯪ ᯒᯬ ᯔ ᯘᯪᯅᯬᯒᯮ ᯖᯬᯔ᯲ᯅᯎ . ᯀᯬᯉ᯲ ᯑᯬ ᯞᯀᯩ ᯑᯖᯮᯉᯔᯪ ᯉ ᯔᯝᯞᯇᯪ ᯂᯬ ᯤ .
ᯀᯪᯉ᯲ᯑᯑ ᯖᯮᯰ ᯤ ᯒᯐᯉᯔᯪ , ᯀᯉᯄ᯦᯲ ᯞᯂᯪ ᯑᯬ ᯉᯪᯉ᯲ᯉ .
ᯉ ᯇᯥᯅᯥᯅ ᯖᯬᯔ᯲ᯇ ᯑᯬ ᯅᯬᯒᯮᯰᯄ᯦ᯬᯉ᯲ ᯇᯀᯘᯪᯝᯘᯪᯰ ᯒᯮᯇ , ᯀᯘ ᯥᯉᯰ ᯀᯑᯬᯰ ᯔᯒ ᯑᯪ ᯖᯬᯝ ᯑᯞᯉ᯲ , ᯀᯮᯔ᯲ᯅᯂᯩᯉ᯲ ᯉ ᯑᯪᯅᯂᯩᯉ᯲ ᯘᯬᯝᯬᯉ᯲ ᯤ . ᯑᯪᯘᯬᯉ᯲ ᯑᯬ ᯂᯐᯮᯖ᯲ᯔᯮ ᯑᯖᯮᯉᯔᯪ . ᯉᯪᯉ᯲ᯉ ᯘᯪᯅᯬᯒᯮ ᯖᯬᯔ᯲ᯅᯎ .
ᯐᯑᯪ ᯑᯪᯐᯞᯬ ᯑᯖᯮ ᯤ ᯔ ᯂᯮᯂᯮᯖ᯲ ᯑᯪᯇᯒᯩᯘᯬ , ᯑᯪᯘᯪ ᯘᯮᯑᯩ ᯀᯰᯄ᯦ ᯎᯮᯒᯪᯎᯮᯒᯪ ᯑᯬᯂᯬᯖ᯲ ᯅᯮᯞᯩᯅᯮᯞᯩ , ᯎᯅᯩ ᯞᯘ᯲ ᯔ ᯒᯬᯂᯉ .
ᯔᯰᯂᯖᯤ ᯔ ᯀᯬᯔ᯲ᯇᯮ ᯎᯮᯀᯘ ᯑᯬᯂᯬᯖ᯲ ᯑᯖᯮ ᯔᯒ᯲ᯖᯮᯰᯄ᯦ᯬᯖ᯲ ᯅᯬᯘᯪ , ᯑᯪᯑᯬᯄ᯦᯲ ᯔ .
ᯀᯮᯔ᯲ᯅᯂᯩᯉ᯲ ᯉ ᯐᯪᯉᯬᯥ ᯂᯔᯮᯉ ᯑᯖᯮᯉᯔᯪ , ᯉ ᯖᯒ᯲ᯘᯮᯰᯎᯮᯞ᯲ ᯖᯒ᯲ᯘᯮᯒᯪᯒᯰ ᯑᯪ ᯅᯎᯘᯉ᯲ ᯀᯖᯩᯀᯖᯩ , ᯎᯬᯑᯰ ᯔ ᯐᯬᯞ᯲ᯔ ᯉᯪᯂᯇᯪᯀᯉ᯲ ᯉ ᯔᯒ᯲ᯇᯪᯉᯒᯪᯅᯬᯖ᯲ ᯐᯞ ᯎᯅᯩ . ᯀᯘ ᯖᯪᯞᯪᯂᯬᯉ᯲ᯔᯮᯉ ᯐᯬᯞᯬ ᯘᯪ ᯀᯐᯪ ᯉᯰᯄ᯦ ᯇᯪᯒᯪᯰ , ᯑᯩᯅᯖ ᯉᯪ ᯇᯒ᯲ᯔᯉᯮᯂᯬᯉ᯲ , ᯀᯘ ᯅᯬᯒ᯲ᯂᯖ᯲ ᯑᯔᯰ ᯀᯬᯉ᯲ ᯔᯝᯒᯪᯒᯪᯖ᯲ , ᯀᯰᯎᯪᯀᯖ᯲ ᯀᯑᯬᯰ ᯅᯬᯒᯮ ᯉᯪ ᯂᯞᯄ᯦᯲ ᯉ ᯎᯅᯩ ᯤᯉᯉᯔᯪ ᯔᯔ᯲ᯅᯬᯀᯉ᯲ ᯎᯬᯀᯒ᯲ᯉ ᯘᯬ ᯒ ᯘᯮᯑ, ᯉ ᯎᯅᯩ ᯎᯉ᯲ᯖᯪ ᯂᯞ᯲ᯞᯮᯝᯬᯉ᯲ ᯉᯪ ᯑᯔᯰ ᯀᯬᯉ᯲ , ᯤᯔ ᯇᯪᯉᯒᯪᯅᯬᯖ᯲ᯉᯔᯪ . ᯀᯤ ᯐᯬᯞ᯲ᯔ ᯉ ᯑᯝᯬᯞ᯲ ᯑᯬ ᯂᯔᯪ ᯉ ᯑᯮᯀ ᯀᯞ ᯘᯬ ᯔᯒ᯲ᯑᯬᯝᯉ᯲ ᯀᯉᯄ᯦᯲ .
ᯔᯬᯞᯬ ᯤ ᯑᯬ ᯂᯇᯩ ᯉ ᯇᯪᯉᯝᯪᯑᯬ ᯉᯪ ᯒᯬᯂᯔᯮᯉ , ᯖᯇᯐᯬᯰᯐᯬᯰ ᯐᯞ ᯖᯇᯔᯘ ᯔ ᯇᯒ᯲ᯔᯉᯮᯂᯬᯉ᯲ ᯑᯪ ᯖᯬᯒᯮ ᯉᯪ ᯀᯔ᯲ᯇᯰ . ᯐᯑᯪ ᯑᯪᯇᯖᯮᯇ ᯉᯘᯪᯑ ᯔ . ᯔᯒᯞᯔᯖ᯲ ᯔ ᯑᯖᯮ ᯔᯒ᯲ᯖᯮᯰᯄ᯦ᯬᯖ᯲ ᯅᯬᯘᯪ . ᯔᯝᯪᯂᯮᯖ᯲ᯂᯬᯉ᯲ ᯅᯬᯀᯅᯬᯀ ᯉᯪ ᯇᯒ᯲ᯔᯉᯮᯂᯉ᯲ ᯤ ᯀᯪᯉ᯲ᯑᯰ ᯀᯑᯬᯰ ᯅᯩ ᯎᯮᯉᯉ ᯀᯇᯬᯀᯉ᯲ ᯔᯝᯒᯪᯒᯪᯖ᯲ , ᯐᯞ ᯉᯮᯝ ᯒᯬ ᯥᯞᯮᯂᯉ᯲ ᯀᯪᯰᯄ᯦ᯬᯉ᯲ ᯀᯑᯬᯰ ᯔ ᯂᯬᯘ ᯞᯀᯬᯘ᯲ ᯑᯪ ᯅᯎᯘᯉ᯲ ᯘᯔᯪᯰᯎᯮ ᯀᯬᯉ᯲ .
ᯑᯪᯘᯮᯰᯄ᯦ᯮᯉ᯲ ᯘᯪᯅᯬᯒᯮ ᯖᯬᯔ᯲ᯅᯎ ᯔ ᯔᯉᯰ ᯅᯩᯂ ᯑᯬ ᯅᯬᯀᯅᯬᯀ ᯉᯪ ᯇᯒ᯲ᯔᯉᯮᯂᯬᯉ᯲ ᯤ , ᯐᯑᯪ ᯑᯪᯀᯞᯮᯘᯪ ᯑᯖᯮ ᯤ ᯔ . ᯔᯉᯖ᯲ ᯔ ᯐᯬᯞᯬ ᯤᯖᯬ , ᯥᯉᯰ ᯔ ᯐᯬᯞᯬ ᯅᯬᯒ᯲ᯂᯖ᯲ ᯑᯪ ᯅᯎᯘᯉ᯲ ᯑᯮᯀ ᯖᯬᯞᯮ ᯀᯒᯪ ᯔᯉᯰ ᯖᯮ ᯑᯪᯀ ᯇᯩ ᯒᯐ ᯤ , ᯤᯀ ᯘᯬ ᯘᯂᯖ᯲ ᯖᯮ ᯇᯪᯖᯮ ᯀᯒᯪ .
ᯔᯬᯞᯬ ᯑᯮᯰ ᯘᯪᯑᯮᯰ ᯤ ᯅᯬᯤ ᯔ ᯉᯘᯪᯑ ᯅᯬᯒ᯲ᯂᯖ᯲ . ᯇᯬᯘ᯲ ᯔ ᯒᯬᯂᯔᯮᯉ . ᯅᯬᯒ᯲ᯂᯖ᯲ ᯔ ᯀᯂᯮ ᯔᯮᯞᯄ᯦᯲ ᯖᯮ ᯂᯮᯖ , ᯉᯪᯉ᯲ᯉ ᯑᯖᯮ ᯤ .
ᯀᯞᯤ ᯑᯪᯑᯬᯄ᯦᯲ ᯘᯪ ᯅᯬᯒᯮ ᯖᯬᯔ᯲ᯅᯎ ᯔ . ᯀᯉ᯲ᯖᯬᯰ ᯐᯞᯬ ᯂᯔᯮ ᯔ ᯒᯪᯰᯎᯪᯖ᯲ ᯇᯒ᯲ᯂᯰᯄ᯦ᯮᯝᯉ᯲ ᯑᯬᯂᯬᯖ᯲ ᯑᯩᯔ᯲ᯅᯉ᯲ ᯉ ᯉᯪᯤᯂᯬᯖᯉ᯲
ᯑᯮᯰ ᯘᯞ᯲ᯇᯮ ᯑᯮᯀ ᯖᯬᯞᯮ ᯀᯒᯪ ᯀᯬᯉ᯲ ᯔ ᯀᯂᯮ ᯔᯝᯞᯇ᯲ ᯤ ᯉᯪᯉ᯲ᯉ , ᯐᯑᯪ ᯔᯮᯞᯄ᯦᯲ ᯔ ᯤᯅᯉ .
ᯇᯑᯮᯀ ᯀᯒᯪᯂᯬᯉ᯲ ᯑᯪᯑᯬᯄ᯦᯲ ᯔ ᯖᯮ ᯅᯬᯒᯮᯉ. ᯤᯖᯬ ᯖᯬᯔ᯲ᯅᯎ ᯑᯬᯂᯬᯖ᯲ ᯂᯬ , ᯀᯂᯮ ᯔᯔᯩᯒᯩᯰ ᯇᯪᯉᯂᯉ᯲ᯖ ᯖᯮ ᯐᯔ᯲ᯇᯞᯉ᯲ ᯀᯤ ᯉᯮᯝ ᯞᯩᯞᯩᯰ ᯀᯪᯉ᯲ᯑᯰ ᯂᯩᯀ ᯂᯮᯖᯪᯞᯪᯄ᯦᯲ ᯅᯩ ᯂᯥᯔᯉ᯲ᯖ , ᯅᯬᯒ᯲ᯂᯖ᯲ ᯔ ᯀᯂᯮ ᯉᯪᯉ᯲ᯉ .
ᯑᯪᯑᯬᯄ᯦᯲ ᯅᯬᯒᯮᯉ ᯤ ᯔ , ᯇᯉ᯲ᯑᯬᯄ᯦᯲ ᯉᯪ ᯑᯖᯮ ᯤ ᯉᯉ᯲ᯖᯬᯀᯒᯪ ᯀᯔᯰ , ᯥᯉᯰ ᯔ ᯐᯬᯞᯬ ᯞᯂᯬ ᯖᯮ ᯅᯞᯪᯀᯉ᯲ ᯉᯪ ᯂᯮᯖ ᯑᯪ ᯅᯎᯘᯉ᯲ ᯑᯮᯀ ᯖᯬᯞᯮ ᯀᯒᯪ ᯀᯬᯉ᯲. ᯀᯞ ᯉᯪ ᯤ ᯥᯉᯰ ᯔ ᯐᯬᯞᯬ ᯑᯔᯰ ᯞᯂᯬ , ᯂᯔᯪ ᯇᯩ ᯔᯔᯩᯒᯩᯰ , ᯑᯬᯂᯬᯖ᯲ ᯔᯉᯪᯞᯪᯄ᯦᯲ ᯂᯥᯔᯉ᯲ᯖ ᯤ . ᯅᯂᯩᯉ᯲ ᯔ ᯤ ᯖᯮᯰ ᯉ ᯎᯬᯑᯰ ᯑᯬ ᯑᯬᯂᯬᯉᯬᯉ᯲ ᯉᯪ ᯀᯰᯄ᯦ ᯑᯖᯮ . ᯔᯬᯞᯬ ᯐᯮᯔ᯲ᯇ ᯖᯪᯰᯄ᯦ᯪ , ᯑᯇᯬᯖ᯲ ᯇᯤᯘᯬᯒᯰ . ᯔᯬᯞᯬ ᯑᯮᯰ ᯑᯪᯐᯞᯬ ᯖᯬᯉ᯲ᯑᯪ , ᯖᯪᯉᯬᯉ᯲ᯖᯮᯂᯬᯉ᯲ ᯉᯪ ᯑᯩᯅᯖ , ᯀᯪᯰᯄ᯦ᯬᯉ᯲ ᯑᯬ ᯀᯬᯞᯬᯀᯉ᯲ . ᯀᯪᯉ᯲ᯑᯰ ᯘᯪᯔᯉᯮᯄ᯦᯲ᯔᯉᯮᯄ᯦᯲ , ᯘᯪᯅᯬᯉ᯲ᯖᯒ᯲ ᯀᯉ᯲ᯑᯬᯒ , ᯀᯪᯉ᯲ᯑᯰ ᯘᯪᯖᯬᯑᯬ ᯖᯮᯒ᯲ᯇᯮᯄ᯦᯲ ᯘᯪᯀᯂᯮᯖ᯲ ᯞᯬᯔᯬ ᯉᯪ ᯒᯬᯂ , ᯖᯬᯉ᯲ᯑᯪ ᯔ ᯔᯤᯔᯤᯔ ᯇᯝᯞᯩᯂᯬᯉ᯲ ᯉᯪ ᯑᯩᯅᯖ
ᯅᯬᯒ᯲ᯂᯖ᯲ ᯔ ᯀᯬᯔ᯲ᯇᯮ ᯎᯮᯀᯘ ᯖᯮ ᯂᯒ᯲ᯅᯝᯉ᯲ ᯉᯪ ᯂᯮᯖ ᯤ , ᯑᯪᯖᯖᯇ᯲ ᯔ ᯇᯪᯉᯂᯉ᯲ ᯉ ᯖᯬᯒᯬᯇ᯲ ᯤ ᯉᯮᯝ ᯘᯬᯝᯬᯉ᯲ ᯉ ᯔᯩᯇᯒ᯲ . ᯔᯰᯄ᯦ᯮᯞᯪᯰ ᯔ ᯑᯪ ᯒᯬᯂᯉ ᯀᯘ ᯑᯪᯀᯞᯤ ᯇᯇᯮᯝᯮᯂᯬᯉ᯲ . ᯑᯪ ᯉ ᯔᯒ᯲ᯑᯞᯉ᯲ ᯤ ᯤᯅᯉ , ᯑᯪᯀᯰᯄ᯦ᯖ᯲ ᯔ ᯎᯑᯮᯎᯑᯮ , ᯞᯀᯬᯘ᯲ ᯖᯩᯞ᯲ᯘᯮᯄ᯦᯲ ᯔ ᯇᯖ᯲ᯉ ᯞᯀᯬᯘ᯲ ᯔᯑᯅᯮ ᯖᯮ ᯇᯰᯄ᯦ᯮᯒᯂᯉ᯲ ᯉᯪ ᯇᯒᯪᯖ᯲ ᯤ . ᯖᯬᯔ᯲ᯇᯮ ᯔ ᯅᯞᯪᯄ᯦᯲ ᯀᯖᯩᯀᯖᯩᯉ ᯐᯞ ᯔᯉ᯲ᯘᯤ ᯂᯉ᯲ᯘᯪᯖ᯲ . ᯘᯪᯀᯉ᯲ ᯉ ᯑᯀᯬ ᯀᯑᯬᯰ ᯔ ᯔᯔᯬᯞᯮᯘ᯲ , ᯑᯪᯤᯑ ᯔ ᯉᯖᯮᯀᯖᯮᯀ ᯤ , ᯞᯀᯬᯘ᯲ ᯑᯪᯑᯇᯬᯖ᯲ᯂᯬᯉ᯲ ᯂᯇᯩ ᯉᯮᯝ ᯔᯬᯒᯬᯝᯬᯒᯬᯰ .
ᯔᯒ᯲ᯞᯬᯐᯬᯝᯪ ᯔ ᯤᯅᯉ ᯞᯂᯬ ᯇᯅᯬᯀᯂᯬᯉ᯲ ᯖᯮ ᯘᯪᯅᯬᯒᯮ ᯖᯬᯔ᯲ᯅᯎ . ᯐᯑᯪ ᯖᯮᯔᯖᯝᯪᯘ᯲ ᯔ ᯘᯪᯅᯬᯒᯮ ᯖᯬᯔ᯲ᯅᯎ ᯞᯂᯬ ᯔᯔᯩᯒᯩᯰ ᯀᯔᯉ ᯤ , ᯑᯮᯰ ᯤ ᯑᯪᯅᯬᯀᯉ᯲ ᯔ ᯖᯮ ᯐᯅᯮ .
ᯀᯞ ᯉᯮᯝ ᯔᯞᯔᯮᯉ᯲ ᯅᯮᯞᯮᯰᯅᯮᯞᯮᯰ , ᯘᯪᯒᯰ ᯔ ᯖᯔ᯲ᯇᯮᯄ᯦᯲ . ᯖᯬᯘ᯲ ᯔ ᯂᯬᯘᯉ , ᯔᯒᯮᯐᯮᯰ ᯝᯬᯞᯮᯉ .
Mantap amang,,,
BalasHapus